【舊贊育醫院終於列法定古蹟｜但第二街公共浴室呢？】
今日政府刊憲，將位於西邊街和第二街第三街交界的舊贊育醫院主樓 aka 西區社區中心列為法定古蹟。遲來的事，一早就應該做。
舊贊育醫院（1922年落成）位於西營盤西邊街，係香港華人婦女產科服務嘅里程碑，亦係香港公共衛生史嘅重要見證。呢幢紅磚建築連同旁邊嘅前西約方便所及西約公立醫局（1909年，已列法定古蹟），同埋第二街公共浴室（1925年），構成咗一個記錄西營盤鼠疫歷史同衛生發展嘅建築群。連同在兩街之隔既東邊街國家醫院建築群（包括現址贊育醫院、西營盤賽馬會診所、菲臘牙科醫院、英皇佐治五世紀念公園、舊精神病院和舊華人精神病院）當年維多利亞城西部華人聚居地嘅故事，就係靠呢啲建築物去承載。
但可惜嘅係，政府到依家仍然拒絕將第二街公共浴室列為法定古蹟。
2021年2月，當時由民選區議員主導嘅中西區區議會，已經通過動議要求古諮會重新評級，將第二街公共浴室列為法定古蹟。當日會議上，區議員彭家浩、張啟昕、甘乃威同本人都指出，呢座浴室係香港現存唯一戰前公共浴室，係香港鼠疫歷史嘅活教材，應該同舊贊育醫院、前西約方便所作為一個衛生建築群整體考慮。
但政府當年只係俾咗個二級歷史建築評級，完全唔理民意。
結果？食環署宣布第二街公共浴室將於2025年6月1日關閉。百年歷史，話停就停。
更加荒謬嘅係，現時委任嘅「區議員」楊學明建議將浴室活化做「社區客廳」。
講起「社區客廳」，就不得不講近日《集誌社》揭發嘅醜聞。高山道社區客廳三年獲關愛基金撥款2755萬，但營運機構社區關愛協會主席、親共派「立法會」議員楊永杰，被揭經關連公司「優視購」同「金卓創富」採購物資。呢兩間公司董事分別係葵青區議會增選委員余靖浵同啟德北關愛隊成員，全部都係楊永杰友好。前職員爆料，「團購公司」報價仲貴過連鎖超市，懷疑有人從中獲利。
你信唔信，呢啲就係親共派口中嘅「服務街坊」？
2016年，我哋喺石塘咀自資開設「西柚辦公室」，搞社區客廳、街坊互助網絡、物資轉贈平台，冇攞過政府一蚊。我哋成功孵化咗唔少活躍嘅街坊組織同社區網絡，真正做到鄰里互助。但政府同親共派呢？佢哋將「社區客廳」變成圍標採購、利益輸送嘅溫床，用公帑養肥自己友。
第二街公共浴室如果真係變成「社區客廳」，會唔會又係下一個高山道？楊匪學明同佢果舊「山水豆腐」會唔會又出黎呃飯食？
2021年民選區議會通過嘅動議，要求政府「盡快提供資料予古諮會，將第二街公共浴室列為法定古蹟」。四年過去，政府唔單止冇跟進，仲要關閉佢，再交俾建制派玩。
香港嘅歷史保育，從來都係選擇性。舊贊育醫院列古蹟，當然值得支持，但唔應該掛萬漏一，遺忘咗同一建築群入面嘅第二街公共浴室。
Leave a Reply